《九龍城寨之圍城》- 在沙石飛揚中細味風的形狀

《九龍城寨之圍城》劇照

前幾日終於入場睇咗《九龍城寨之圍城》。

隔咗成個禮拜先寫感想，我諗最主要嘅原因都係成套劇俾我嘅感覺都係有少少雞肋。而熱潮都就嚟過，我都不諱言由沙石到欣賞嘅地方講吓我點睇套戲。

1. 無睇過《明日戰記》，但當入場睇完呢套後，我會有「古天樂製作嘅大卡士電影都有一種獨有嘅 format 」呢種諗法。
2. 雖然整體上特技都令人歎為觀止，但開頭果幾分鐘龍卷風(古天樂)登場果幕，佈景的確係好似舞台劇…… 個天就一塊黑幕，然後逐個 item 砌上去，一啲現場感都無。幸好隨住往後劇情視角有進一步融入城寨內圍，就開始無出現以上問題。
3. 打戲方面，頭一幕林峯拳拳到肉打爛仔交、又玻璃擦面咁周身傷，但下一個鏡頭洪金寶招攬佢就即刻青靚白淨無傷，確實有少少出戲。之後再睇信一（劉俊謙）登場，先醒起係喎，應該以返武打漫畫嚟看待，所以就算往後打得誇張少少都可以接受。
4. 文戲方面，角色對白俾我感覺係「Sleeping Dog 式講廣東話」。話說以前有隻外國遊戲叫 Sleeping Dog, 製作團隊專誠嚟香港取景，更加搵咗陳冠希嚟配其中一個角色，但偏偏裡面啲角色都係好似用緊英文句式講廣東話咁，配落個香港場景度就顯得好怪異。而今次睇《城寨》竟然都有同樣感覺，明明演員都係在地香港人，但偏偏講啲港式粗口就好似卡住卡住咁，係有種講唔出嘅違和感。（可能平時大家都好斯文無講開粗口？）
5. 至於故事內容，雖然聽聞電影已經比漫畫原著簡化唔少劇情，但個人認為電影喺講述劇情方面仍然係有啲吃力。主軸講嘅「三代情」（任賢齊、洪金寶、黃德斌等老嘢一代，古天樂、郭富城一代、其餘林峯等人一代），正正就係講緊香港時下老中青三輩人面對緊嘅問題（有評論更指明係演藝界，呢方面論者想得更深入）。而我認為吃力嘅位，就係化解老中青矛盾嘅說教角色，都係要靠夾喺中間位置嘅和事老龍卷風（即係古天樂）一力承擔。
6. 講到呢個位，我就更加感受到古生喺戲裡戲外角色嘅密不可分。諗起之前喺 Youtuber channel 試當真聽過幾段 live, 有一位只出聲無開樣、把聲好似古生嘅重量級嘉賓「Jimmy仔」，喺節目大吐苦水講演藝界一盤散沙要點團結之類。其中有一幕我係好深刻，係佢不停問在場嘅鍾雪有咩想講、不滿之類，而鍾雪只係強調要做好自己，明顯就係被逼到好緊。我感受到嘅係「Jimmy仔」應該係好想作出一啲改變，個肉緊程度係好強烈、好想推動所有人齊心協力去做果種。
7. 所以睇呢套戲，可能好多人諗到嘅係有無做出原著漫畫嘅味道、或者懷緬九龍城寨昔日係點，但喺我心中纏繞不散嘅，係Jimmy仔夾喺老青兩輩中間，不斷做住推動角色嘅身影。
8. 值得一提係，原著漫畫龍卷風嘅原型係哥哥張國榮，而造型方面，則發生過因為tvb劇《城寨英雄》內角色吳春美（吳嘉樂飾）涉抄襲漫畫而被作者起訴。而劉俊謙亦喺電影《梅艷芳》內代飾演過張國榮。故此如果要以「跟足漫畫原著」優先的話，我諗以劉俊謙著唐裝演龍卷風，應該會係一個幾好玩嘅嘗試。但明顯電影係另有考量…