今日久違回老家一趟,又睇晒無線整個晚間時段嘅節目。
《東張西望》:唔知係咪錯覺,經歷完何太事件後,啲報導小心咗好多,情願啲嘢報得悶悶地,都要包幾重頭盔。
《愛回家開心速遞》:走咗啲舊人又要培育新人,呢頭都未谷完膠面素,呢頭又落力谷個三太子。之前都仲會覺得只要表現不過不失就可以喺愛回家生存到,但經歷完太多更替,呢個「無記鐵飯碗」已經不復再。
《家族…. (唔知乜鳩 sor 名太長)》:林峰同阿蛇真係神擔當,演出自然,睇得舒服、順眼。一睇就大結局,但明幫第二集舖路,劇情上就無咩起伏,但啲細節意想不到嚟得好。演員對戲都意外地自然,無之前啲所謂「台慶劇」果種造作味道。
《繁花》:結論放前面,相反呢套比我想像中突兀,話晒片頭大大隻字寫王家衛,一心諗住應該係信心保證。誰知美指場景服飾都做得好靚,但劇情就⋯⋯ 有啲老土同拖。
睇落去我係明佢想致敬八九十年代嘅港產片,主體又想回歸「本心」,故事想借套劇教化世人,做生意要老老實實、講人情味;可惜不止時代背景,就連說教手法都非常陳舊,睇完一集我嘅感覺係:可惜。浪費咗個華麗嘅場景,去講一個又長又臭嘅故事。結果主角胡歌就淪為不停擺甫士去做個搖擺不定嘅生意佬,然後致敬港產片嘅部分就成為「後周星馳年代」不斷消費 good old days 嘅尷尬戲碼。
我再重申美術果方面個人認為係無可挑剔嘅,只不過係出現嘅時機,人物同劇情間嘅舖排,就遠遠跟唔上前者,甚至突然出現嘅一幕令人有種「格硬嚟」之感。
聽聞套劇喺香港上海都係爆紅,香港有師奶賣帳就算啦,啲上海佬會睇得上呢類落足 filter 嘅老情懷咩?呢點我就有啲疑問。
《玩轉深中懶人包》:成班無線死剩新人齊齊托煒哥大腳,真心吃不消。不過喺阿媽從旁介紹下,大致了解到鏡頭下一堆騎呢怪係咩人。原來都有幾多係近屆港姐冠軍,一係就太mk、一係就樣太老,唔講都唔知係港姐。
不經不覺睇咗成晚,我只能講自己對老大台係完全無抵抗力,又可能係想借個機會懷緬吓同阿媽睇吓劇吹吓水嘅美好時光。