《周處除三害》- 點睇「為民除害」？

《周處除三害》宣傳海報

繼年頭三大港產賀歲片創造無盡話題後，Netflix 新上映嘅《周處除三害》都成為近期熱話之一。我應該都算係比較遲嘅一批人去睇，略講一下感想。

老規矩：無簡介、含劇透，請慎讀。

1. 首先醜話說喺前頭。我認為呢點比較重要，所以先將爭議放上頭，立場講明先，免得大家睇完先唔高興。
2. 我係喺睇完電影再搵有關影評，先知電影捲入抄襲風波。但如果觀乎指控者列舉抄襲嘅點，我會認為指控嘅力度唔係好夠：畢竟如果只係觀乎主角希望人死留名、以及自首需要排隊等在地荒誕設定等等，大致上我認為此類起始設定大抵只可以視為「起手式」而已；
3. 即係有啲似考試局出一篇「試從無法自首殺手之角度，以千五字續寫他的經歷。」，我相信唔會有人拎住兩份卷話設定一樣係抄掛？當然導演參考完某啲設定後反面不認人可能係有啲難睇，但如果話到係抄襲，我倒覺得不致於。
4. 正如我嘅認為所講，如果單從「疑被抄襲」嘅人物設定、戲首安排去睇，我會評價初段嘅情節只屬普通，而由於劇情未到引人入勝嘅地步，好多設定上嘅荒誕同bugs都顯得格外不順眼。就好似「黑市醫生姨姨」嘅角色，普遍都明白佢嘅設定係服務緊唔少劇情推進，但偏偏放喺開頭登場嘅場口，就有幾幕都會令觀眾疑惑：點解幫殺手做嘢好似咁兒戲？
5. 喺納悶嘅時候，有一樣嘢係幾吸引我：套戲嘅配色同構圖。構圖好睇就不在話下，配色上你係見到大部分場景都配上唔到程度深淺嘅藍色（係大至主場景，細至去到經過學校、醫院等只出一幕嘅場，都會見到藍色物件嘅出現）。至於最後一戰場景主要用嘅白配金色，亦係服務另一個用途。如果稍加留意的話都會睇到製作上嘅用心，就算唔睇劇情，唯美配色都加晒分。
6. 劇情上稍有睇頭嘅，應該都要去到中段，開始對上第二號通緝犯、綽號「香港仔」嘅袁富華。自經典作《叔·叔》後，都有唔少電影出現佢嘅身影，但我諗真正發揮到其演技嘅，呢套相信應該都要數頭三。其中一段主角阮經天同佢互相試探嘅對手戲極有張力：即使廣東話同國語兩種語言互對並毫無違和。
7. 主角同袁富華中間有三場打戲。打戲太血腥、中間一場混戰太混亂，我唔睇開打戲會覺得有啲亂，但節奏尚算明快。
8. 但估唔到往後去到打大佬一段先係全片高潮所在。對頭號通緝犯一役可分兩部分：悔改與報復。令我意想不到嘅位係，如果單睇前段主角喺神秘宗教團體悔改一部分，主角為罪後悔改變，然後自首服罪，基本上來個「全片完」，雖然故事會偏向平淡，但亦不覺太有違和感：因為觀眾焦點會集中喺主角嘅生平領受上，所以如此發展亦算有基本嘅起承轉合。最重要係呢個貌似「佛教+基督教」嘅神秘宗教出現得並唔算討厭，就算有基督教會離教者背景嘅我，亦會覺得或者呢個係個好宗派。
9. 當然分得後半部，就係要將前半部嘅設定來個大扭轉。教會上下嘅黑暗面逐漸暴露，而得知自己受騙嘅主角，亦基於正義感同團體對抗，最後不敵眾力被生葬。之後主角破棺而出、死而復活一幕就唔顯得荒誕 — — 因為呢幕正正點中聖經講嘅「新造的人」、耶穌死後三日復活嘅…