【論文化風氣，隨想】

我份人從來好簡單：睇字唔睇錯字，聽故盡量明晒先駁故，講理據唔會睇你係咩身份就話「你無資格講」。

有時睇得多咩文化、繁簡、廣東話定書面語入文之爭，都開始覺得有啲懨悶，與其不停針對廣東話入文嘅「的的了了」，攪到想起步創作嘅後生裹足不前，倒不如關注下啲文章題材點解都係千篇一律好過。

講起最近所謂林燕妮熱潮，坦白我都係喺林燕妮仙遊後先有緣接觸佢嘅著作。但從佢字裡行間已經睇到佢果種超脫世俗嘅思考方式同洞察力，當然你可以話要有佢對寫作嘅執著，先會鍛造到佢今日嘅修為，但我睇到嘅係所有嘢唔係一蹴而就，比起咩文筆措辭，作者嘅思維模式更為重要。我覺得更應睇重文章都係睇題材同內容。

舉個例子，如果我睇到一篇咩都市傳說二三四奶嘅，見到同類標題嘅短期內我唔會再睇第二篇。又或者果啲扮愛情專家應該點點點，言中無物講乜都要正能樣嘅雞湯，真心已經泛濫，我求求呢類作者們，不如唔好再寫好嘛？有時情願市面見番篇擺明ff 嘅玄疑、恐怖，都唔想再睇果啲假到ff 不能嘅愛情文。

自己都試過量產式寫文呃like，好明白果種人寫我寫或者睇住邊篇文爆就照抄嘅運作係點。但我作為讀者，就唔係太頂得順果種題材juicy但內容蒼白嘅風氣。

都係果句，比起「正字」正確，諗下點樣導正題材千篇一律化嘅風氣仲好。

（閱多篇文章有感非針對）