《曼克頓愛情故事》- 笑中有淚
Published in
Feb 4, 2023
多謝 Netflix 劇《First Love》,經由呢套老土狗血愛情劇、同劇入面主角阿媽喺另一套劇都渣過的士比對嘅網圖,竟令我發現到另一套接近廿年前,名為《曼克頓愛情故事》(Love Love Manhattan) 嘅超神級劇集。
喺劇集《First Love》飾演女主角老母嘅演員 — — 小泉今日子,喺《First Love》飾演一位唔懂得表達愛、只認為替子女「選擇」物質先係為佢哋爭取幸福嘅失敗母親(但某啲場景明明就表現得好開明,誠為劇本不足之處),固然係有點太過浪費(但無可置疑嘅係,就算劇本將呢個角色寫得「進退失據」,佢都係演得幾討好)。原來呢位「綠葉」都拍過唔少好睇嘅日劇:包括早幾年又係同滿島光合作嘅《監獄公主》、同埋廿年前即將會講嘅呢套《曼克頓愛情故事》。無獨有偶,以上提及嘅呢兩套劇都係出自鬼才編劇宮藤官九郎手筆,難怪如此精彩。